Clubtrophy 2023

25 Jahre Ruderclub Sarnen

Ein Rückblick in Gedichtsform zur Geschichte des RCS 1996-2021

von Fredy Blättler

Hit, da fyyremer midänand äs grossartigs Summerfest,
miär, dr Ruäderclub Sarnä , zämä mit vilnä Gescht.
Dr Grund isch, dass dr Verein sit 25 Jahr als RCS da staad
Ich glaibä, dass es ai nu mehreri Jahrzähnt so wiiter gaad

Sporttag a der Kantonsschuäl z’Sarnä hend z’Inträssi am Ruädersport gweckt.
D‘ Idee vom Turnlehrer Rolf Jakob Rudern in der Schule, hed mä niiw entdeckt
Schuälruädärä a dr Kantonsschuäl isch hit ä anerkannti Sportdisziplin
und Mittelschuälrennä mit begeischtertä Jungä a dr Regatta gitts witherhin.

Ruädära hedmä dannzumal wellä uf nä breiteri Öffentlichkeit abstützä,
Sport triibä dussä i dr Natuir, dr scheeny Sarnersee als Sportgrät nytzä
Gäld hedmä wellä us em Sporttotto, Grindig vomä Verein is Aug de gfassed
Liit begeischtärä, Mitglieder suächä und uberziigä, dass alles passed

Mid uisdiäntä Holzboot vom Verband isch mä gscharted zum Ruderbetrieb
ä kniffligi Sach das Ruädärä, ä gwagligi Aglägäheit, das chamä nid eifach uf Ahieb.
Know-how hed’s bruicht, alli hends Rudärä wellä lehrä, hend ständig probiert
Christian Steiger, Ambrosius Widmer und Frauke Potrykus hend RCS-ler trainiert

Yyigschränkt ischmä gsi zWilä wäg dä Training vom Verband
Eigäständig hedmä wellä wärde, das möglichscht bald!
D Schuäl zSarnä, d’Boot z’Wilä, so chad das nid wiitergaa
Äs eiges Bootshuis neech bi der Kantonsschuäl willmä ha!

Land vom Chloster, Panzerzält vo dr Armee bim Pulverturm
Niämmer isch begeischtered, häbid Blachä bim nechschtä Sturm?
Immer nu kein Bliibi, So gaad das nid wiiter! Gottfriedstutz!
Kei Chance, dr Pulverturm stad nämli under Dänkmalschutz

Aber i der Neechi, am hitigä Platz, hedmes erichtet äs prächtigs Huis
Nach Plän vom Kari und Unterstützig vom Sepp, jaja s‘Burchä diä chemid druis
Z’Interässi am Ruädärä isch gwachsä und d’Mitgliederzahlä sind gschtigä
D’Folg: Mee Boot, mee Uisfahrtä mee Platz am Stäg zum I- und Uisstiigä

Dank dä Grinder hemmer äs Bootshuis, tolli Boot, sind ä Verein
mit Mitglieder us allnä Schichtä, ganz eifach, ä Club für gross und klein.
Was wend miär anders, was wend mir meh?
mir hend doch iisä wunderscheeni Sarnersee !